Die Musikgesellschaft Wasen wurde im Jahr 1916 gegründet.

Chronik

Leider chan i Öich ersch vo 1931 a prichte, wiu s’erschte Protokoubuech niene z’finge isch.

Im Jahr 1931 isch Tschabold Dirigänt gsi. Doch mit däm Maa het d’Musig s’Höi nid geng uf dr glyche Bühni gha, u scho im 32gi het dr Dirigäntestab zum Fritz Nussboumer gwächslet. A Usflüg hets de bi dr Musig nif gfäut. Si hei amene Sundigmorge am achti abgmacht, si is Riedbad glüffe, u dert hets de afe öppis z’ässe gäh. Drufache si si wyter glüffe, u das zwar uf d’Lushütte (dä wo z’Bier het müesse trage het nid emau öppis drvo übercho), nachhär ufs Arni u vo dert us i Chuttu u när de hei. Im 33gi hei si es Chiuchekonzärt mit em Männerchor zäme gha, u scho es Jahr speter, isch dr Musigtag im Wase gsi, u dert het ä Reingwinn vo 1000 Franke usegluegt. Vom 35gi chan i Öich nüt verzeue, wiu kei Jahresbricht gmacht worde isch. Im 36gi isch d’Wasemusig i Oberwaud glüffe, wo si es Freikonzärt gha het. Vo dert us si si nach Chaschishuus glüffe, u dert hets e Tropfe Wy aus Sterkismittu gäh. Vo dert us isch d’Wanderig no is Oberhorn gange, u nach eme guete Zabe mit Chäs, Brot u Wy isch d’Musig hei zue gange. Zugunschte vo dr Chiucherenovation im 37gi het d’Musig mit em Froue- u Männerchor es Konzärt gäh. O e grosse Tag isch im 38gi gsi, wo si äm Bundesrat im Rössli es Ständli hei chönne gäh. Öppe vo mitti Oktober a isch du d’Musig ygschteut worde, wäge dr Muu- u Chlauesüüch. Im 39gi isch d’Mobiumachig cho, u so isch du das Konzärt i s’Wasser gheit. Nach dr Oschtere isch es tu ume wyter gange, bis im 40gi di zwöiti Mobiumachig cho isch, u si hei öppe für zwe Monet müesse höre Musig mache. Di erschti Vereinsfahne isch im 41gi kouft, u d’Fahneweih mit em 25 jährige Jubiläum verbunge worde. Nid ume im Strasseverchehr, sondern ou bi de Musigüebige hets i de Vierzgerjahr Buesse gäh, nämlich: Unentschuldigt 50Rp. Verspätet 20Rp. u wär nach de Nüne cho isch, däm isch nume no di haubi Prob agrächnet worde. Verschideni Gartefeschtli u Läbchuechezwirbele het d’Wasemusig im 42gi uf d’Bei gstöut. Äs Ungerhautigskonzärt het si im 43gi bym Fäudschiesse gäh. im 44gi het dr Dirigänt gwächslet u dä het Hans Stauder gheisse. Wo dr Chrieg im 45gi isch fertig gsi, het d’Wasemusig us luter Fröid es Platzkonzärt gäh. Nach eme Geburtstagsständli, wos o isch luschtig gange, he i si am Jmhof Hänseli d’Haar fasch kau abghoue, wiu är i d’RS het müesse yrücke. Im 46gi isch z’Aemmitalische Schwingfescht im Wase gsi, u dass si dert hei chöne mithäufe, hei si z’Zoubrügg am Musigtag abgseit. am 25. Ougschte 46 isch d’Wasemusig mit 108 Pärsone nach Ängubärg greist. „Hört ihr die Motoren“, so hets im 47gi tönt, wiu d’Musig im Kleinegg e Flugtag het chönne dürefüere. Am Gartefescht i dr Churzenei im 48gi, wo mit eme Freikonzärt isch verbunge gsi, hei si gwüss e chly z’fiu Läbchueche gha, u es het e jede Musikant e Pflichtkonsum müesse hei näh. Am 9. Juli, am Morge am föifi si si mit em Car nach Nöieburg greist.

Im 50gi si di erschte Verhandlige für ne nöji Uniform über d’Bühni. Am Jahreskonzärt im 51gi isch d’Wasemusig schön im Gred vo de Lüt cho, si nämlich so ne Komiker agschteut, names Carolus Magnus, u was är het chönne biete, isch wäger fasch vor zwänzg Jahr Mode gsi. Nach zwöine Jahr, nämlich im 52gi, het sech d’Musig du für ne nöji Uniform chönne entschliesse. im 53gi het W. Hügli dr Dirigäntestab überno. Im gliche Jahr wo ufem Wase der Musigtag stattgfunge het. Doch scho eis Jahr später, im 54gi isch ume Stauder Hans Dirigänt worde, u är zwänzg Franke pro Musigüebig Lohn übercho. Z’Dirigänteproblem isch wyter gange u si hei im 55gi scho ume e nöie Dirigänt müese sueche. Dr Paul Küenzli vo Huttu het sech für das Amt zur Verfüegig gschteut, drufache hei si e zwöitägigi Reis nach St. Moritz gmacht, wos aune e längi Nacht het gäh. Zum erschte, zum zwöite, so hets im 56gi tönt, wiu di auti Uniform verschteigeret worde isch. im 57gi isch s’erscht Mau e Fleischcheiglet düregfüert worde. Aune Mitglieder, wo im 58gi freiwiuig amne Buur si ga häufe Höie, hei vo dr Musigkasse füfzäh Franke übercho.

Im 59gi isch z’Reisefieber über se cho, u si hei ä zwöitägegi Reis nach Italie gmacht. im 60gi han i nüt bsungersch chönne läse. im 61gi isch dr René Spada Dirigänt worde. I de Jahr 62 u 63 isch o nüt bsungersch gsi. E Nöi-Instrumäntierig isch im 64gi gsi u o d’Gründig vore Buuremusig. Im 65gi isch Turnhaueyweihig über d’Bühni, wo d’Musig het es Konzärtli gäh.

S’erschte Eidg. Musigfescht, wo d’Wasemusig teu gnoh het, isch im 66gi z’Aarou gsi, u zuglich isch ou di erschti Frou i d’Wasemusig ufgnoh worde. Im Ougschte druf isch ou no 50 jährigs Jubiläum gfyret worde. D’Reis nach Heidubärg isch im 67gi gmacht worde, u drufachse si Kummerbuebe gfiumet worde, wo d’Wasemusig het chönne mithäufe. O e nöie Dirigänt hets im 67gi gä, nämlech dr Iseli Heiri. Im 68gi si d’Theaterlüüt vo dr Musig a dr Houptversammlig vo dr Kant. Chrankekasse no einisch go z’Theater uffüere, wo si am Winterkonzärt gha hei. Vom 69gi, weisi nüt z’verzeue. Doch scho im 70gi het d’Musig es Chiuchekonzärt gha u dr Erlös isch de Lawinegschädigte vo Rekinge z’guet cho. Sie hei s’Gäut nid öppe gschickt, nei si heis grad persönlech überbracht, ufere Reis dert häre. im 71gi hets uf em Wase scho ume es Fescht gäh, nämlich dr Musigtag. Leider isch im 72gi der Dirigänt Iseli Heiri auzufrüeh verstorbe. Aus Nachfouger isch der Fankhuser Ruedi gwäut worde.

Di auti Uniform het usdienet gha u drum hets im 73gi ä Nöi-Uniformierig gäh. Im 74gi het s’Radio i dr Turnhaue vo dr wasemusig Ufnahme gmacht. O isch s’Kant. Musigfescht z’Burduf gsi, u ufem Wase isch d’Jungmusig gründet worde.

Im 75gi het s’Carungernähme Summer AG ä nöie Car kouft u si hei zu dere Jungferefahrt d’Wasemusig yglade. Im 76gi het d’Musig am Eidg. Musigfescht z’Bieu mitgmacht. Di änglischi Brass-Band „The wood fool Band“ het uf em Waseim 76gi es Konzärt gäh. Scho ume e Dirigäntewächsu hets im 77gi gäh, nämlech vo Fankhuser zu Haudin. O a dr Aulayweihig im 78gi het d’Musig dörfe es Konzärt gäh. Mit Haudin isch d’Musig nid glücklech gsi, u es het scho im 79gi ume gwächslet, nämlech zum Ruedi Röthlisberger. Im 80gi isch s’erschte Passivkonzärt gsi, u das scho ume mite eme früsche Dirigänt nämli mitem Hofer Kurt. O isch d’Reis is Appizäuerland gsi. E nöji Fahne hets du im 81gi gäh. Glichzitig het d’Jugendmusig die erschti Fahne übercho. Im 82gi isch d’Wasemusig a dr BEA ga konzärtiere. D’Reis is Wallis isch im 83gi uf em Programm gstange.

Es Marschmusigkonzärt mit dr Sumiswaudermusig isch im 84gi z’schtang cho, u drufache im 85gi isch dr Regional-Jugendmusigtaf uf em Wase gsi. Für uf Winterthur as Eidg. Musigfescht, het sech d’Wasemusig im 86gi grüschtet gha. Im 87gi isch d’Musig by strömendem Räge nach Locarno greist. Im 88gi isch ume e Musigtag ufem Wase gsi, nämlich dä vo de grosse Musige. Nach Langethau as Kant. Musifescht isch d’Wasemusig im 89gi gange. Ga Reise isch d’Musif im 90gi is Wallis u scho si mir i üsem Jubiläumsjahr acho. I chönnt Öich no mängs Müschterli verzeue, vo verschiedene Musigüebige, Ständli oder süsch luschtige Feschtli…

Ja, so bi re Musig isch haut geng öppis los, oder öppe nid?