Kantonales Musikfest Aarwangen 2014

Am Samstimorgä 14.Juni si mir bi Sunnäschin guet glunnät z’Aarwangä mit em Empfangs-Apéro gstartet.

Die wunderbari Atmosphäre u ds Losglück, dass mer ersch gäge Mittag chöi spielä, hei sicher scho zur guetä Stimmig bitreit.

Chli go Musige losä, chli diskutierä u scho isches Zyt gsi für go itzspielä its Probelokal.

Äs isch chli kommisch gsi… oder isch mä itz plötzlich glich deno närvös wordä?

Üsä Dirigänt Marc Fuhrer isch aber ganz ruhig blibä u het z’Ispiu suverän gfüert. O wo uf z’mou „Mängä’s“ Cornet plötzli het afo chouderä:

Mi weiss nid, ob Luft u Wasser oder doch beides däm Instrumänt hei wöuä ä Streich spielä!

Marc het si Zouberstab glüpft u ds Chouderä u d Närvosität si verschwundä gsi.

 

Im Vortragslokau träge mer äm zahlrichä Publikum u natürli dä verdeckdä Expertä zersch ds Ufgabästück Aarwangen vor, ..isch mä glich no chli närvös? Nei, äs louft gäng wie besser u bi üsem Säubstwahlstück ‚Jubilate‘ het mä bidä gregoranischä Färse, wo d’Wase-manne singe, scho fasch z’gfüel, es sigi d’Mönchä säuber uf dr Bühni !

Stouz verlömer d’Bühni, mir hei üses wuchälang Güebtä chönnä ablieferä oder chli passender gschribä mir hei ganz toll musiziert !!

Ja würkli mit Liib u Seel musikalisch gstautet.

 

Nachem Mittagässä simer gäg der Marschstrecki zue. Mir hei chönnä dr Marsch ‚Musketiere‘ vorträge, es het wunderbar klungä u glüfä simär o grad Tip Top.

Mit 98,5 Punkt simmer grad ufä 4 Rang füre Marschiert.

 

No chli verwilä u när warte bis am Eufi zersch wärde no d Veteranä geehrt.

Itz geit di Rangverkündigung los mir sie aui sehr gpannet, mir wüssä u hoffä das mer witt vor chöi si .

Aber grad ufe 2. Rang u nummä ä huch Rückstand ufä Erscht het glich mängä Musikant fröidig überrascht.

..mir si überglücklech fröidäträne fliessä u aui gniessä die Momäntä.

Dankä Marc Fuhrer…. Chapeau dir Wäseler!
dr Es-Bassist

Rangliste BKMF 2014 Aarwangen

MGW_MM_Aarwangen